Kia takatū...

Kotahi rau kupu (kāore i kō atu, kāore i kō mai) #126

I ngā pōti ā-kaunihera i te tau 2022, e 42% noa iho o ngā kaipōti i tuku pōti.

Engari, he take nui e pōtihia ana hei ngā pōti ā-kaunihera e tū ana ā te Hepetema me te Oketopa o tēnei tau.

Ka tū hoki tētahi pōtitake-here e pā ana ki ngā wāri Māori.

Mehemea ka pōti te tokomaha ake i te 50% o ngā kaipōti kia whakakorea aua wāri Māori, ka whakakorea rawatia.

He pōti ā-pōhi tēnei, nā reira tātou mā, āta tirohia te rārangi pōti kia kitea ai, āe rānei, kei reira tōu ingoa, me tō wāhi noho tika.